МТМ НЕТ

Во детската градинка „Гоце Делчев“ во Општина Илинден беше пуштена во употреба нова централна кујна, проект со кој се унапредуваат условите за исхрана и престој на децата, а на свеченото отворање присуствуваа министерот за социјална политика, демографија и млади Ѓоко Велковски, премиерот Христијан Мицкоски и градоначалникот на Илинден, Александар Ѓорѓиевски.

Новата кујна, изградена според современи стандарди, ќе има капацитет за подготовка на повеќе од 800 квалитетни оброци дневно за децата во градинката, но и за учениците од основните училишта во општината.

Проектот беше реализиран во рок од една година од поставувањето на камен-темелникот, а во следниот период е предвидена и адаптација на старата кујна во нови занимални.

Со тоа ќе се обезбедат дополнителни места за околу 60 деца и ќе се зголеми капацитетот за згрижување.

Министерот Велковски истакна дека вложувањето во предучилишната инфраструктура останува еден од приоритетите на Министерството за социјална политика, демографија и млади, со цел создавање подобри услови за ран детски развој.

Тој посочи дека во текот на годината е предвидено отворање на 15 нови детски градинки, со што ќе се обезбедат околу 1.800 нови места за деца, а до крајот на 2027 година целта е да бидат отворени вкупно 37 нови градинки низ државата.

Од Министерството нагласуваат дека инвестициите во проширување на капацитетите на градинките ќе продолжат и во наредниот период, со фокус на обезбедување современи, безбедни и квалитетни услови за раст и развој на најмладите.

Фото извор: https://vlada.mk/mk-MK/odnosi-so-javnost/soopstenija