МТМ НЕТ

Опозициската партија СДСМ денеска излезе со остри критики кон владините политики, барајќи од Јавното обвинителство итна и целосна истрага за трошењето на средствата преку Државна лотарија, обвинувајќи ја власта за континуирано зголемување на јавниот долг и отворајќи сериозни прашања за безбедносната и здравствената криза во Гостивар.

Во фокусот на реакциите на опозицијата се наоѓа финансиската транспарентност околу организирањето на настанот со светски познатиот диџеј Дејвид Гета, за кој од СДСМ тврдат дека чинел 5,5 милиони евра преку Државна лотарија, наспроти првичните владини тврдења.

Од партијата посочуваат дека за овој случај се сокриени договори, анекси, фактури и податоци за платени даноци, поради што бараат Јавното обвинителство детално да ја истражи целосната документација, текот на парите, евентуалниот судир на интереси и начинот на кој биле носени одлуките.

Покрај тоа, опозицијата се осврна и на економско-финансовата состојба, обвинувајќи ја власта за прекумерно задолжување преку непрекинато издавање на државни хартии од вредност, како и преку новото задолжување на ЕСМ од околу 33 милиони евра за набавка на батерии во Битола.

Според нив, овие мерки дополнително го оптоваруваат буџетот и креираат финансиски товар врз граѓаните, додека државните задолжувања секоја недела продолжуваат со високо темпо.

На план на внатрешната безбедност и јавното здравје, СДСМ упати критики до министерот за внатрешни работи Панче Тошковски, обвинувајќи за десетнеделно молчење и недостаток на целосни јавни извештаи за безбедноста на водата за пиење во Гостивар.

Дополнително, опозициската партија ги оспори објавените статистички податоци за намалување на криминалитетот, предупредувајќи на пораст на семејното насилство и отворајќи прашања за контролата на границите и институционалната одговорност.