МТМ НЕТ

Во насока на унапредување на енергетските стандарди и грижата за животната средина, Општина Илинден успешно го финализираше првиот дел од програмата за финансиска поддршка на граѓаните.

Градоначалникот Александар Георгиевски денеска ги врачи првите решенија за 60 домаќинства кои ги исполнија критериумите од јавниот повик, овозможувајќи им еднократна парична помош за набавка на еколошки системи за греење и ладење.

Оваа мерка на Општина Илинден овозможува кофинансирање од 50 отсто од вкупната вредност на инвертер клима уредот или соларниот панел, при што максималниот износ на субвенцијата изнесува 10.000 денари по производ.

Како што истакна градоначалникот Георгиевски, примарната цел е да се стимулираат домаќинствата да преминат кон современи и високоефикасни системи, со што директно се намалува потрошувачката на енергија, се олеснува домашниот буџет преку заштеди и се дава придонес кон почист амбиент.

Општина Илинден потврдува дека останува посветена на креирање политики кои го подобруваат квалитетот на живот на населението, промовирајќи одржлив развој.

Оваа иницијатива е само дел од поширокиот план на локалната самоуправа за трансформација кон енергетски ефикасна општина, која преку конкретни чекори се грижи за своите жители и за еколошките предизвици на иднината.