МТМ НЕТ

Градоначалникот на Општина Илинден, Александар Георгиевски, изврши увид во динамиката на градежните работи на новиот училишен објект во рамки на ООУ „Гоце Делчев“ во населбата Илинден.

Овој капитален проект, кој се реализира во соработка со Владата и Министерството за образование и наука, има за цел да постави нови стандарди во локалната образовна инфраструктура.

Новиот објект ќе се простира на површина од над 900 квадратни метри, организиран на два ката.

Проектот вклучува изградба на 10 современи училници, шест санитарни јазли, од кои два се целосно приспособени за лица со попреченост, како и инсталација на лифт за непречена мобилност.

Дополнително, објектот ќе располага со две простории за складирање и наставничка канцеларија.

Градоначалникот Георгиевски нагласи дека реализацијата на оваа инвестиција е од витално значење за учениците бидејќи ќе овозможи настава во една смена за повеќе од 1.000 деца.

Оваа организација на училишниот процес значително ќе ги подобри условите за учење и ќе овозможи поквалитетно, инклузивно и интегрирано образование.

Инвестициите во образованието остануваат еден од највисоките приоритети на локалната самоуправа.

Општина Илинден продолжува со континуирано и рамномерно вложување во сите основни училишта на својата територија, со цел да се создаде достапен и современ образовен систем за сите ученици, потврдувајќи ја својата заложба за развој на квалитетен кадар уште од најмлада возраст.