МТМ НЕТ

Општина Илинден започна со целосна реконструкција на Домот на култура во Мралино, како дел од програмата за обнова на културните објекти низ населените места во општината.

Со проектот е предвидена санација на кровот со поставување нов пластифициран лим, како и замена на хоризонталните и вертикалните олуци, со што ќе се подобри заштитата и долговечноста на објектот.

Воедно ќе бидат поставени нови ПВЦ врати и прозорци, ќе се обноват надворешните скали и терасата со нови плочки, а ќе биде поставена и нова заштитна ограда.

Реконструкцијата опфаќа и обновување на фасадата, како и целосно уредување на внатрешноста.

Предвидени се поставување гипс-картон, глетување и бојадисување на ѕидовите, како и изведба на нов систем за внатрешно осветлување, со што просторот ќе добие помодерен и пофункционален изглед.

При увидот на градежните работи, градоначалникот Александар Георгиевски истакна дека инвестицијата има за цел да создаде подобри услови за одржување културни настани и активности, овозможувајќи им на жителите современ простор за дружење и културен живот.

Средствата за реконструкцијата се обезбедени од буџетот на Општина Илинден.

Во изминатиот период веќе беа обновени домовите на култура во Ајватовци, Бујковци, Бучинци и Дељадровци, а локалната самоуправа најавува дека обновата ќе продолжи и во останатите населени места.