МТМ НЕТ

Спортската сала „Гоце Делчев“ во населеното место Илинден е предмет на темелна реконструкција, со што локалната самоуправа ја продолжува својата заложба за унапредување на спортската инфраструктура.

По две децении интензивно користење, објектот добива сеопфатен градежен и технички зафат со цел да се обезбеди максимална функционалност, безбедност и енергетска ефикасност.

Проектот опфаќа сериозно освежување на внатрешноста, вклучително санација на таркетот со нанесување заштитни слоеви отпорни на гребење, како и пребележување на теренот за различни спортски дисциплини.

Планирани се темелни внатрешни активности како молерисување на ѕидовите и таваните, реновирање на трибините со нови седишта и заштитна ограда, како и целосна реконструкција на соблекувалните.

Дополнително, за подобрување на условите за тренинг, ќе се постави нов гумиран под и опрема за одбојкарски натпревари.

Модернизацијата на салата е веќе делумно видлива преку неодамнешната замена на старите рефлектори со ЛЕД осветлување, со што значително се подобрија условите за одржување на спортски настани.

При увидот во активностите, градоначалникот Александар Георгиевски нагласи дека целта е создавање простор кој ќе ги задоволи потребите на спортистите, младите и рекреативците, но и капацитет подготвен за организација на меѓународни спортски предизвици.

Овој проект е дел од пошироката стратегија на Општина Илинден за континуирано вложување во капитални инвестиции кои го подигнуваат квалитетот на живот.

Локалната власт најави дека и во иднина ќе продолжи да ја гради и модернизира јавната инфраструктура, потврдувајќи ја својата улога како партнер на спортот и на сите граѓани.