МТМ НЕТ

Камениот мост во Скопје ќе добие нов изглед во вечерните часови. Денеска започнаа активностите за негово декоративно и архитектонско осветлување, информира градоначалникот на Скопје, Орце Ѓорѓиевски.

Според Ѓорѓиевски, современото осветлување ќе биде усогласено со архитектонските карактеристики и историската вредност на мостот, со посебно истакнување на неговите препознатливи сводови.

Проектот, како што наведува, е резултат на соработката со Општина Есенлер од Турција, со која неодамна бил потпишан Протокол за соработка. Ѓорѓиевски упати благодарност до општината за поддршката, како и до институциите и стручните лица вклучени во реализацијата.

„Камениот мост е еден од симболите на Скопје. Наша обврска е да ги чуваме и достоинствено да им ги предадеме на идните генерации“, порача Ѓорѓиевски.