МТМ НЕТ

Градоначалникот на Општина Бутел, Дарко Костовски, остро реагира на, како што вели, обидите на ДУИ прашањето за запишување ученици да го претвори во етничка и политичка тема.

Костовски посочува дека согласно Законот за основното образование и утврдената реонизација, учениците се запишуваат според реонот на основното училиште и додава дека од Општина Бутел се бара да постапи спротивно на тие правила.

„Бутел не е и нема да биде полигон за етнички политики!“, порача Костовски.

Тој вели дека децата не смеат да се користат за создавање етнички тензии и политички поени, додавајќи дека во Бутел нема „наши“ и „ваши“ деца, туку сите треба да имаат еднаков третман и еднакви права.

„Ниту притисок, ниту закани, ниту етничка мобилизација ќе ме натераат да постапувам спротивно на закон“, вели Костовски.

Градоначалникот истовремено обвинува и за интереси на, како што ја нарекува, „урбаната мафија“, која слободниот простор во Бутел го гледа како можност за нова градба.

Костовски порачува дека неговата визија е развој со план, повеќе зеленило, училишта, градинки и спортски терени, без поделби по етничка основа и без урбанистичко дивеење.

„Бутел нема да го делиме по етнички линии и нема да го бетонираме по нечии бизнис-интереси. Бутел ќе го развиваме по закон и во интерес на сите негови граѓани“, порача Костовски.