Институтот за јавно здравје продолжува да ја надградува мобилната апликација „Беббо“, со цел родителите да имаат брз и лесен пристап до сигурни, проверени и научно засновани информации за здравјето, растот и развојот на децата.

По повод Светската недела на доењето, апликацијата е збогатена со нови содржини кои нудат дополнителна едукација и поддршка за родителите. Меѓу новитетите се прашалникот „Доење: практики, искуства и потешкотии“, информации за штетното влијание на пушењето, алкохолот и дрогата за време на доењето, совети за млечните запчиња и првата посета на стоматолог, како и информации за инфо-линијата за откажување од пушење кај доилки.

Во апликацијата се достапни и едукативни содржини посветени на здравиот раст и правилниот развој на децата, со што „Беббо“ продолжува да биде корисен дигитален водич за семејствата.

Од Институтот за јавно здравје истакнуваат дека апликацијата е создадена да биде сигурен партнер на родителите уште од периодот на бременоста, па сè до раното детство на детето.