МТМ НЕТ

Осумнаесет месеци по трагедијата во дискотеката „Пулс“ во Кочани, во која загинаа 63 млади луѓе, а 193 беа повредени, од СДСМ повторно ја обвинија власта дека нема вистинска одговорност за трагедијата.

Од опозициската партија велат дека „правдата за Кочани се топи пред очите на јавноста“ и го обвинуваат премиерот Христијан Мицкоски дека полицијата, обвинителството и судството се под контрола на власта.

„Газда Деко и речиси сите обвинети за ‘Пулс’ се на слобода“, велат од СДСМ, оценувајќи дека жртвите и нивните семејства остануваат без одговори и без правда.

СДСМ го потсетува Мицкоски и на неговата претходна изјава дека ќе се повлече од политиката доколку се докаже поврзаност на обезбедувањето во „Пулс“ со ВМРО-ДПМНЕ. Од партијата тврдат дека тој, како и за други свои ветувања, не го исполнил тоа што го најавил.

Во реакцијата се упатуваат и низа други обвинувања до власта, поврзани со случаи од областа на криминалот, тендерите и постапувањето кон функционери и лица блиски до власта.

„Така изгледа ‘правдата’ на Мицкоски – заштита за моќните, неправда за жртвите“, наведуваат од СДСМ, од каде што бараат целосна, неселективна и вистинска одговорност за трагедијата во Кочани.