МТМ НЕТ

Изградбата на новата детска градинка во населбата Дексион во Општина Ѓорче Петров продолжува со засилена динамика и во текот на летниот период, соопшти градоначалникот Александар Стојкоски.

Според него, станува збор за капитална инвестиција која ќе обезбеди подобри услови за згрижување на најмладите и ќе одговори на потребите на голем број семејства во општината.

Новиот објект ќе се простира на 940 квадратни метри, ќе биде изграден на две нивоа и ќе има капацитет за повеќе од 120 деца.

Стојкоски информира дека градинката ќе биде изградена според современи стандарди, со примена на енергетски ефикасни материјали и со целосно уреден двор наменет за безбедна игра, учење и престој на децата.

Тој оцени дека секоја реализирана инвестиција во образовната инфраструктура претставува вложување во иднината на општината и порача дека локалната самоуправа ќе продолжи со реализација на капитални проекти кои, како што истакна, ќе придонесат за подобар квалитет на живот на граѓаните.