МТМ НЕТ

Градоначалникот на Општина Центар, Горан Герасимовски, упати јавен повик до сите заинтересирани граѓани за учество на јавната презентација на Нацрт-деталниот урбанистички план (ДУП) за Градска четврт Ј 05 – Барутана.

Презентацијата ќе се одржи утре, 3 септември, со почеток во 12:00 часот, во просториите на Општина Центар (барака 6).

Настанот има за цел да им овозможи на граѓаните директно да се информираат за предложените решенија, да поставуваат прашања и да ги изнесат своите забелешки и сугестии.

Јавната анкета за планот е веќе во тек и ќе трае до 14 септември, при што Нацрт-планот е изложен во Основното училиште „Кочо Рацин“, каде граѓаните можат да го разгледаат секој работен ден од 8:00 до 16:00 часот и да пополнат анкетен лист.

Градоначалникот Герасимовски нагласи дека вклученоста на локалното население е од клучно значење за транспарентно и квалитетно урбанистичко планирање на идниот развој на Барутана.