МТМ НЕТ

Министерството за финансии ги објави податоците за реализацијата на Буџетот заклучно со 31 јули 2026 година, кои покажуваат дека приходите се прибираат согласно планот и бележат континуиран раст.

Вкупните приходи во периодот јануари – јули се реализирани во износ од 204,553 милијарди денари (53,9% од планираното за годината), што претставува годишен раст од 9,3%.

Приходите од даноци изнесуваат 117,963 милијарди денари со забележан раст од 10%, при што најголема реализација е евидентирана кај данокот на добивка со раст од 20,6% и кај ДДВ со раст од 13,4%.

Дополнително, кон компаниите е извршен поврат на ДДВ во износ од 23,333 милијарди денари, што е за 3,5% повеќе во споредба со лани.

На расходната страна продолжува силната поддршка на економскиот раст преку капиталните расходи, кои достигнаа 21,288 милијарди денари – значаен раст од 39,6% во однос на истиот период лани, додека 717 милиони денари се трансферирани кон Развојната банка за поддршка на домашните компании.

Во рамките на буџетското извршување редовно се сервисирани и обврските, вклучувајќи исплата на 49,351 милијарда денари за стари долгови на странскиот пазар и 11,665 милијарди денари кон домашни кредитори.