МТМ НЕТ

Европската Унија постигна привремен договор за олеснување и одложување на дел од правилата поврзани со вештачката интелигенција, со цел да се намали административниот товар врз компаниите и да се поттикне технолошкиот развој.

Договорот бил постигнат по деветчасовни преговори меѓу европските претставници, а во наредните месеци треба формално да биде одобрен од владите на земјите членки и од Европскиот парламент.

Според Марилена Рауна, заменик-министерка за европски прашања на Кипар, измените во Законот за вештачка интелигенција ќе им помогнат на компаниите полесно да се прилагодат на новите регулативи, особено преку намалување на бирократските процедури и трошоци.

ЕУ со Законот за вештачка интелигенција сака да воспостави јасни правила за користење на AI технологиите, особено во области што можат да влијаат врз безбедноста, приватноста и човековите права. Истовремено, Брисел се обидува да најде баланс меѓу регулацијата и конкурентноста на европските компании во трката со САД и Кина во развојот на вештачката интелигенција.

Новите измени се оценуваат како обид за поголема флексибилност кон бизнис-секторот, особено за малите и средни компании кои предупредуваа дека строгите правила би можеле да го забават развојот и инвестициите во AI технологиите.