МТМ НЕТ

Според податоците објавени денеска во 10:00 часот на официјалната страна на Централната изборна комисија на Бугарија, при обработени 91.68% од записниците од избирачките места, ова се првичните резултати од изборниот процес во Бугарија.

Најголем број гласови засега освојува коалицијата „Прогресивна Бугарија“, со над 1.3 милиони гласови, што претставува убедливо водство со речиси 45% од вкупниот резултат.

На второто место се наоѓа коалицијата ГЕРБ–СДС со околу 395 илјади гласови, додека веднаш зад неа е коалицијата „Продолжуваме со промената – Демократска Бугарија“ со приближно ист резултат и двоцифрен процент на поддршка.

Понатаму следуваат Движењето за права и слободи – ДПС, потоа политичката формација „Преродба“, ПП МЕЧ, ПП Величие, БСП – Обединета левица, како и партијата „Сјај“, кои бележат пониски, но значајни изборни резултати.

Останатите политички субјекти имаат под 2% од гласовите, додека дел од помалите листи остануваат со минимална поддршка од електоратот.

Податоците се прелиминарни и се очекува конечните резултати да бидат потврдени по целосната обработка на сите изборни материјали, по што ќе биде познат и конечниот распоред на мандатите во новиот состав на парламентот.