МТМ НЕТ

По полуфиналната борба на Ален Рустемовски, Македонскиот олимписки комитет и Боксерската федерација на Македонија поднесоа официјална жалба до Светската боксерска федерација.

Рустемовски по борбата даде изјава во која потврди дека се преземаат конкретни чекори за оспорување на донесената одлука.

https://www.facebook.com/reel/1034030132859963

„Во моментов се поднесува жалба до официјалните мејлови на светската боксерска федерација од страна на генералниот секретар на Македонскиот олимписки комитет, како и Боксерската федерација на Македонија“, информира Рустемовски.

Според правилата, делегатот на борбата има обврска до крајот на денот да ја извести македонската делегација дали ќе биде поведена дисциплинска постапка и дали постои можност за промена на одлуката.

Токму затоа, сега вниманието е насочено кон одговорот од надлежните во светската боксерска федерација.

Македонската страна очекува жалбата да биде разгледана и да се утврди дали во полуфиналната борба имало основ за преиспитување на судиската одлука.

Рустемовски веќе го даде максимумот во рингот. Сега останува институциите да ја продолжат борбата – надвор од него.

Фото: ФФМ