МТМ НЕТ

Фудбалската репрезентација на Македонија до 20 години загуби со 2:0 од селекцијата на САД до 20 години на контролниот натпревар одигран во Бугарија.

Избраниците на селекторот Александар Таневски прикажаа солидна игра против силен противник и одиграа корисен тест кој послужи како добра проверка на формата и дополнително воигрување на тимот.

Македонските младинци успешно му парираа на американскиот состав во најголемиот дел од средбата, но головите ги примија во судиското надополнување на првото полувреме и во 90+2 минута. И покрај поразот, Македонија создаде неколку сериозни можности за погодок, а најзрелите шанси ги имаа Димитар Данев, Адмир Љатифи и Салим Арифи.

Натпреварот го започнаа Васил Ташовски, Златко Радески, Андреј Велков, Адис Мурати, Лука Атанасовски, Димитар Данев, Емир Шаботиќ, Салим Арифи, Тео Сандев, Адмир Љатифи и Даниел Диковски, додека во второто полувреме настапија и Стефан Јованоски, Андреј Мурџески, Фидан Шерифи, Димитар Мартиновски, Виктор Делов, Габриел Крстевски, Андреј Стојановски, Мирза Хасиќ, Иван Шириќ, Ѓоко Спасов, Лука Бојаџиев и Шабан Мемети.

фото: ФФМ