МТМ НЕТ

Македонскиот пејач Мартинијан Кириловски успешно ја претстави Македонија на регионалниот музички фестивал „Бисер Јадрана 2026“, кој се одржа на 18 јули во Тиват, Црна Гора.

Со сигурен сценски настап и впечатлива интерпретација, Кириловски остави силен впечаток кај публиката, колегите и музичките професионалци.

На фестивалската вечер беа изведени 25 композиции, а песната „Сирена“, со која Кириловски настапи како претставник на Македонија, го освои 9. место.

Композицијата претходно беше избрана меѓу повеќе од 170 пријавени песни од автори и изведувачи од целиот регион.

Иако пласманот претставува значаен успех, најголемото признание за песната дојде преку реакциите на публиката и музичката јавност.

Комбинацијата на оригиналната композиција и моќната вокална изведба на Кириловски беше меѓу најзабележителните настапи на годинашното издание на фестивалот.

„Сирена“ е инспирирана од старогрчкиот мит за сирените и ја раскажува вечната борба меѓу искушението и разумот.

Преку современ музички израз, песната ја пренесува приказната за магичниот повик на сирените и внатрешната борба да се одолее на најсилните привлечности.

Зад композицијата стои авторскиот тим составен од Митко Чешларов, кој ја потпишува музиката и текстот, и Ангел Ќосев, автор на аранжманот.

Песната е снимена во студиото „Подрумот“, а претставува ново заедничко музичко остварување по успехот на композицијата „Sećanje na april“.

Со настапот на „Бисер Јадрана 2026“, Мартинијан Кириловски продолжува да го гради своето место на регионалната музичка сцена, а позитивните реакции за „Сирена“ се потврда дека песната има потенцијал да допре до поширока публика.