МТМ НЕТ

Македонскиот пејач Влатко Миладиноски ја промовира својата најнова песна и видеоспот „Михаела“, емотивна балада која носи силна порака за љубовта, носталгијата и животните приказни што оставаат длабока трага.

Песната е создадена во соработка со неговиот брат Златко Миладиноски и претставува посебен музички проект, бидејќи за првпат во македонската музика е опејувано името Михаела. Инспирацијата за песната доаѓа од вистинска животна приказна и е посветена на млада Македонка која живее во Италија.

Автор на музиката и аранжманот е Златко Миладиноски, додека текстот го напиша Ѓорѓи Калајџиев. Со „Михаела“, Влатко Миладиноски се претставува во поинакво светло, нудејќи балада која значително отстапува од неговиот препознатлив музички стил и досегашен репертоар.

Посебен белег на проектот дава и учеството на легендарниот гитарист Петар Ренџов, кој за првпат се појавува како гостин на фолк композиција. Ова е и негова прва музичка соработка со браќата Миладиноски. Интересно е што дополнителна инспирација за неговото учество била фактот дека и неговата ќерка го носи името Михаела.

Видеоспотот, реализиран во продукција на „Moonlight“, е снимен на три различни локации. Првиот дел е сниман во Италија, каде во кадар се појавуваат Михаела и нејзиниот партнер – луѓето кои ја инспирирале оваа музичка приказна. Вториот дел е реализиран во Скопје со сцените во кои настапува Петар Ренџов, додека завршните кадри се снимени во Валандово, на фестивалската сцена каде Влатко и Златко Миладиноски настапуваат придружувани од голем оркестар.

Авторите упатија благодарност до градоначалникот на Валандово, Ѓоко Камчев, за поддршката во реализацијата на проектот, како и до сите соработници кои учествуваа во создавањето на видеото и музичката продукција.

„Михаела“ е песна исполнета со искрени емоции, љубов и копнеж, која преку музиката раскажува приказна што лесно ќе се препознае кај секој што некогаш сакал, чекал или посветил песна на некого.