МТМ НЕТ

Македонската музичарка MIYATTA ја претстави својата нова песна „Ти биди СВОЈ“, проект кој е целосно снимен и отсвирен во живо во студиото „Подрумот“ во Скопје.

Авторка на музиката, текстот, вокалната изведба и дел од аранжманот е самата MIYATTA, која за реализацијата на песната соработуваше со повеќе музичари. Виолината ја отсвири Гоце Вангеловски, на пијано настапува Бојан Димитровски, додека гитарските делници ги изведуваат Кире Мирчовски и Јаков Ѓорговски. Бас-гитарата и тапаните се дело на Иво Митковски.

Посебен белег на композицијата ѝ дава звукот на бенџото, инструмент карактеристичен за кантри музиката, кој го отсвири американскиот музичар Рики Миер. Според авторката, неговото учество ја нагласува универзалноста на музиката и нејзината способност да ги надминува границите.

За аудио продукцијата и аранжманот беше задолжен Ангел Ќосев, со кого MIYATTA веќе има остварено неколку успешни соработки.

Видеоспотот за песната е снимен на две локации во Македонија – Пробиштип и Кучково, места кои, како што истакнува авторката, за неа имаат силна позитивна енергија. Режијата ја потпишува самата MIYATTA, директор на фотографија е Сашо Доковски, а монтажата е на Горан Цветковиќ.

Пејачката упати благодарност до Балетското студио „Магија“ од Пробиштип и до локалната заедница во градот за поддршката при реализацијата на видеото. Дел од спотот е снимен и на карпата во Кучково, во Општина Ѓорче Петров, која авторката ја опишува како место со посебна енергија.

Преку песната и видеото, MIYATTA испраќа порака за прифаќање на сопствената индивидуалност, ослободување од предрасуди и чувство на комфор во сопствената кожа.

„Сакав видеото да ја пренесе енергијата што значи за мене кога сум своја, растеретена од сите норми и очекувања. Се надевам дека оваа позитивна порака ќе допре до сите на кои им е потребна и дека песната ќе биде прифатена од македонската публика“, порачува MIYATTA.

Новата композиција „Ти биди СВОЈ“ носи мотивирачка порака за самодоверба, слобода и лична автентичност, вредности кои авторката ги става во центарот на своето најново музичко издание.