МТМ НЕТ

Македонската поп-ѕвезда Тамара Тодевска ја претстави својата најнова песна „Драма квин“, која е првиот официјален сингл од претстојниот албум „Кукла жива“.

Со ова музичко издание, пејачката отвора ново творечко поглавје и најавува проект со поинаков и амбициозен пристап.

Автори на песната се Тамара Тодевска и Коста Петров, додека музичкиот аранжман е дело на Емин Џијан. Во создавањето на композицијата учествувале повеќе од 50 музичари и хор, што на песната ѝ дава богат и впечатлив звук.

Видеоспотот за „Драма квин“ е реализиран во студиото „Takat“, а режијата ја потпишува Мартин Трајановски, долгогодишен соработник на Тамара на повеќе нејзини музички проекти.

Новиот албум „Кукла жива“ ќе содржи десет композиции снимени исклучиво со живи инструменти. Проектот има и дополнителна уникатност, бидејќи станува збор за првиот визуелен албум реализиран во Македонија, преку кој секоја песна ќе добие сопствена визуелна приказна.

Тодевска открива дека песните на албумот се инспирирани од различни животни искуства и периоди од нејзиниот личен и професионален пат. За „Драма квин“ вели дека носи брза и енергична атмосфера, а снимањето на видеото било исполнето со креативност и одлична соработка со тимот со кој работи со години.

Песната веќе е достапна на официјалниот YouTube канал на Тамара Тодевска, а наскоро ќе може да се слушне и преку останатите дигитални музички платформи.

Паралелно со промоцијата на новиот материјал, Тамара и нејзиниот тим активно се подготвуваат за големиот концерт со кој ќе биде претставен албумот „Кукла жива“. Концертната промоција е закажана за 3 октомври во арената „Борис Трајковски“, каде публиката ќе има можност првпат во живо да ги слушне новите песни.