МТМ НЕТ

Со спектакуларно шоу, неизвесно гласање и силна конкуренција, синоќа во Виена заврши големото финале на Евровизија 2026, а победата ја однесе Бугарија со песната „Bangaranga“, изведена од Дара.

Со вкупно 516 поени, Бугарија за првпат во својата историја успеа да го освои престижниот евровизиски трофеј. Второто место му припадна на Израел со 343 поени, додека трета заврши Романија со 296 поени.

Финалната вечер донесе раскошна сценографија, моќни вокални изведби и бројни визуелни ефекти, а арената во Виена беше исполнета со публика од цела Европа. Голем фаворит според обложувалниците беше Финска, но и покрај очекувањата, не успеа да влезе меѓу првите три земји.

Годинашното издание на Евровизија беше посебно и поради одбележувањето на 70 години од постоењето на натпреварот, па во ревијалниот дел настапија и поранешни победници и евровизиски ѕвезди.

Покрај музиката, финалето го одбележаа и реакции во салата за време на настапот на Израел, што повторно отвори дебати за политиката и нејзиното влијание врз најголемиот европски музички спектакл.

Со победата на Бугарија, следното издание на Евровизија во 2027 година најверојатно ќе се одржи во Софија, што ќе биде прво домаќинство за оваа земја во историјата на натпреварот.