МТМ НЕТ

Македонската рок група Архангел официјално се враќа на музичката сцена со новиот сингл „Дни оловни“, најавувајќи ново дискографско поглавје и голем самостоен концерт во Скопје.

По повеќе од 20 години од последното студиско издание, бендот повторно објавува нова музика, чиј автор е фронтменот Ристо Вртев. Песната носи силна симболика и тематски ја поврзува долгогодишната кариера на Вртев со актуелниот творечки период, задржувајќи го препознатливиот автентичен рок израз на бендот.

Синглот е снимен и продукциски обработен во скопското студио „Clinic Sound“ со Нино Спиркоски, додека sound design-от го потпишува Марко Миличевиќ – Gramophonedzie. Новата музика се најавува како вовед во петтото студиско издание на групата.

Паралелно со објавата, Архангел го најавуваат и концертот „Срцевина“, кој ќе се одржи на 13 јуни на стадионот на АРМ во Скопје, каде покрај добро познатите хитови, публиката ќе има можност да слушне и нов материјал во живо.

Проектот и концертот се реализираат под издавачката куќа Adriatica Records, а влезниците се веќе достапни во онлајн продажба и преку дистрибутивната мрежа низ земјата.