МТМ НЕТ

Светска здравствена организација предупредува на појава на кластер на хантавирус поврзан со патување со крузер, при што досега се регистрирани седум случаи, од кои три со смртен исход.

Според информациите, станува збор за брод со вкупно 147 патници и членови на екипажот. Потврдени се два случаи на хантавирус, додека пет се сомнителни. Едно лице е во критична состојба, а три имаат полесни симптоми.

Заболените развиле симптоми во периодот од 6 до 28 април, кои вклучувале треска, гастроинтестинални проблеми и брза прогресија кон пневмонија, акутен респираторен дистрес и шок.

Бродот тргнал од Ушуаја на 1 април и поминал низ повеќе оддалечени и еколошки специфични региони, меѓу кои Антарктик, Јужна Џорџија и неколку острови во Атлантикот. Во моментов е закотвен крај брегот на Кабо Верде.

СЗО информира дека истрагите се во тек за да се утврди изворот на инфекцијата, а меѓународни тимови координирано работат на изолација на случаите, медицинска евакуација и лабораториски анализи.

Хантавирусот е ретка, но сериозна болест која најчесто се пренесува преку контакт со урина, измет или плунка од заразени глодари. Иако ретко, можно е и ограничено пренесување од човек на човек.

Ризикот за глобалната популација во моментов се оценува како низок, но СЗО најавува дека ќе продолжи внимателно да ја следи состојбата.

Здравствените власти препорачуваат зголемена хигиена, внимателност при појава на симптоми и навремено јавување кај медицински лица. На патниците и екипажот им е советувано да останат во своите кабини, да практикуваат физичка дистанца и редовно да ги следат своите здравствени состојби.