МТМ НЕТ

Со поместувањето на стрелките еден час нанапред, граѓаните утрово се разбудија со еден час помалку сон.

Иако промената на летното сметање на времето е вообичаена, таа сепак може да предизвика замор, намалена концентрација и чувство на дезориентираност, особено во првите денови.

Експертите советуваат денешниот ден да се искористи за постепено прилагодување на организмот. Престојот на дневна светлина и кратка физичка активност, како прошетка, може да помогнат телото побрзо да го воспостави новиот ритам. Се препорачува и зголемен внес на течности, како и избегнување тешка и масна храна која дополнително го оптоварува организмот.

Доколку чувствувате замор, дозволена е кратка дремка, но не подолга од половина час, за да не се наруши вечерниот сон. Клучно е вечерва да се легне порано, со цел полесно да се надомести изгубениот час.

Промената на времето може да има влијание и врз почетокот на работната недела. Во првите неколку дена можно е намалување на концентрацијата, продуктивноста и благ пораст на стресот. Затоа, се препорачува обврските да се организираат постепено, без дополнителен притисок.

Лекарите советуваат да се одржува редовен ритам на спиење, да се избегнува користење електронски уреди доцна навечер и внимателно да се консумира кофеин, особено во попладневните часови.

Иако промената може да предизвика краткотраен дисбаланс, повеќето граѓани се прилагодуваат во рок од неколку дена. До тогаш, умереното темпо и грижата за сопственото здравје се клучни за полесно надминување на „изгубениот“ час.