МТМ НЕТ

Одговарајќи на пратеничко прашање во Собранието, министерката за образование и наука, проф. д-р Весна Јаневска, истакна дека доградувањето на новите училници во основното училиште „Киро Глигоров“ во Општина Центар е пред завршување, со што наскоро целосно ќе се овозможи поквалитетна едносменска настава за сите ученици.

Таа појасни дека и покрај навремено поднесеното барање, општинската администрација издала одобрение дури кон крајот на јули, што предизвикало краткотрајно доцнење и принудно следење на настава онлајн за дел од учениците, истовремено укажувајќи на неопходноста од исправување на минатите пропусти во планирањето на капацитетите со оглед на растот на населението во општината.

Повикувајќи ги политичарите да ги тргнат рацете од образованието и да се насочат кон единство за подобрување на резултатите од меѓународните тестирања како ПИСА, министерката се осврна и на процесот на оптимизација.

Според податоците од УНИЦЕФ и Светската банка, во земјава има вишок од 1.800 паралелки и 3.000 наставници, но и покрај тоа што годинава се споени 430 паралелки поради недостиг на ученици, ниту еден наставник не го изгубил своето работно место.

Јаневска додаде дека успешно е надминат и предизвикот во ОУ „Петар Здравковски – Пенко“ во општина Бутел, каде се задржани четирите паралелки на албански јазик и им е овозможен упис на сите деца од Чаир кои имаат браќа или сестри во училиштето.