МТМ НЕТ

Во организација на Македонскиот културно-информативен центар во Тирана, од 3 до 6 септември се одржа манифестацијата „Недела на македонската култура во Албанија“, која со учество на повеќе од 70 уметници од Македонија понуди богата и незаборавна програма пред бројната публика во Тирана, Драч и Корча.

Како што истакна директорката на КИЦ во Тирана, Ема Попивода, настаните привлекоа исклучителен интерес и беа широко проследени од албанските медиуми, вклучувајќи го и гостувањето на македонските уметници во емисиите на националната телевизија „Топ чанел“.

Затворањето на програмата во Старата чаршија беше обележано со изложбата на фотографии „Убавините на Преспа“, изведба на монодрама посветена на Крсте Петков Мисирков, претставување афоризми на македонски јазик и настап на фолклорното друштво „Преспа“, придружени со музички изведби на македонски уметници.

Манифестацијата предизвика големо внимание во јавноста, претставувајќи ги богатството и разновидноста на македонската култура низ музиката, поезијата, театарот, фотографијата и фолклорот.

На сите настани присуствуваше и националниот координатор за интеркултурализам, развој на културата и меѓуресорска соработка, Абаз Селмани, со што беше потврдена силната институционална поддршка за унапредување на соработката меѓу двете земји.

Овој значаен културен мост беше реализиран со поддршка од Министерството за култура и туризам на Македонија, Амбасадата на РС Македонија во Албанија и Министерството за туризам, култура и спорт на Албанија.

Фото извор: https://kultura.gov.mk/