МТМ НЕТ

Градоначалничката на Кисела Вода, Бети Стаменкоска Трајкоска, соопшти дека Советот на општината изгласа иницијатива за меѓуопштинска соработка со Град Скопје, со што се отвора патот за реализација на долгоочекуваниот проект за пробивање на улицата „Димо Хаџи Димов“.

Со ова решение се предвидува директно поврзување на сообраќајницата со кружниот тек пред населбата Припор, потег со кој се очекува конечно да се стави крај на повеќегодишниот сообраќаен хаос во овој дел од градот.

Реализацијата на овој инфраструктурен зафат има за цел значително да го растерети притисокот кај крстосницата со улицата „Христо Татарчев“, во близина на бензинската станица „Мечкаров“.

Според надлежните, проширувањето ќе овозможи побрз проток на возилата, зголемена безбедност за сите учесници во сообраќајот и видливо намалување на времето што граѓаните го минуваат чекајќи во колони.

Градоначалничката Стаменкоска Трајкоска потенцираше дека ваквите проекти се резултат на координираното делување меѓу општинските и градските власти, што е клучно за успешно спроведување на крупните инфраструктурни интервенции.

Таа најави дека екипите наскоро ќе излезат на терен за почеток на градежните активности, потврдувајќи ја определбата на локалната самоуправа за решавање на секојдневните проблеми на жителите на Кисела Вода преку конкретни и функционални решенија.

Фото извор: https://www.facebook.com/betistamenkoska?locale=mk_MK