МТМ НЕТ

Општина Кисела Вода отвори постапка за доделување еднократна парична помош за сите жители кои претрпеа материјални штети на своите станбени објекти како последица на неодамнешните обилни врнежи и невремето што го зафати Скопје. Оваа мерка е насочена кон директна поддршка на семејствата кои се соочуваат со последиците од елементарната непогода.

Градоначалничката Бети Стаменкоска Трајкоска ги повика сите оштетени граѓани да ја достават потребната документација до општинската архива во најкраток можен рок.

Апликациите треба да содржат барање, фотокопија од лична карта или пасош (за малолетни лица извод од МКР), копија од трансакциска сметка, доказ за сопственост на објектот, како и фотографии од настанатата штета и записник од надлежен орган за претрпената непогода.

Откако барањата ќе бидат примени, посебно формирана комисија ќе изврши теренска проценка на пријавените штети. Врз основа на извештаите од комисијата, Општината дополнително ќе одлучува за одобрување на финансиските средства за помош.

Од општинската управа потенцираат дека остануваат целосно посветени на своите жители и дека службите работат со забрзано темпо за да се обезбеди навремена поддршка за сите оштетени лица.

Граѓаните се охрабруваат документацијата да ја достават што поскоро за да се овозможи непречено и ефикасно постапување од страна на надлежните служби.