МТМ НЕТ

Градоначалничката на Општина Кисела Вода, Бети Стаменкоска Трајкоска, објави детални информации за сеопфатниот бран на обнова, проширување и модернизација кој во моментов ги опфаќа сите основни училишта на територијата на општината.

Стаменкоска Трајкоска потенцираше дека преку овие капитални инвестиции, кои се реализираат дел самостојно, а дел со силна поддршка од Владата и ресорните министерства, локалната самоуправа континуирано вложува во најмладите.

Целта на овие активности е обезбедување современи, квалитетни и безбедни услови за секој ученик. Во тие рамки, во ООУ „Невена Георгиева - Дуња“ веќе е во тек голема доградба на објектот со нови училници и санитарни јазли, а училиштето дополнително е опремено со десетици нови компјутери, лаптопи и интерактивни панели.

Паралелно со ова, градоначалничката информираше за крупни зафати и во останатите училишни објекти каде фокусот е ставен на дигитализацијата, спортската содржина и подобрувањето на хигиената. Во ООУ „Партенија Зографски“ е направена темелна реконструкција на тоалетите, поставено е лед-осветлување и нова интернет мрежа, целосно се опремени кабинети со нов мебел и ИТ опрема, додека дворот доби ново хортикултурно уредување со над 150 садници.

Истовремено, во централниот објект на ООУ „Круме Кепески“ се реновираат спортската сала, соблекувалните и трпезаријата, а веќе е потпишан и договор за доградба на уште шест нови училници, додека во подрачното училиште е отворена нова, опремена ресурсна соба за инклузивна настава.

Во меѓувреме, инфраструктурната офанзива продолжува и во ООУ „Кузман Јосифовски - Питу“, каде во тек е изградба на нова спортска сала, по претходно завршената обнова на електричната инсталација и збогатувањето на ИТ фондот.

Проблемите со инфраструктурата се санирани и во ООУ „Кирил Пејчиновиќ“, каде со поставување павер-елементи на влезот е решен долгогодишниот проблем со задржување на водата, а внатрешноста е освежена со лед-осветлување и нови компјутери.

Безбедноста на учениците е подигната во ООУ „Кузман Шапкарев“ преку нова хидрантска мрежа и енергетски ефикасна врата, додека во ООУ „Св. Климент Охридски“ и ООУ „Рајко Жинзифов“ дворовите се уредени со нови патеки, а набавени се и нови смарт-табли, компјутери и спортски реквизити.

Стаменкоска Трајкоска заклучи дека обврската на општината е да обезбеди простор каде децата безбедно ќе учат и ќе ги остваруваат своите потенцијали, бидејќи инвестицијата во современи училишта е директен влог во иднината на Кисела Вода.

Фото извор: https://www.facebook.com/betistamenkoska