МТМ НЕТ

Градежните активности за комплетно реновирање на објектот на месната заедница во населбата Драчево се наоѓаат во завршна фаза и се одвиваат со брзо темпо. Овој општински простор, кој со децении беше запоставен и во исклучително лона состојба, секојдневно го менува својот изглед благодарение на интензивната работа на терен.

Досега градежните екипи целосно ја финализираа грубата градба и ја поставија новата кровна конструкција, а во моментов нивниот фокус е насочен кон внатрешното уредување и изведбата на надворешната фасада.

Како дел од оваа темелна обнова, целосно се менуваат застарените и нефункционални електрични, водоводни и канализациони мрежи во самиот објект.

Со новиот покрив и термичката фасада значително ќе се зголеми енергетската ефикасност на зградата, а за климатизација ќе бидат инсталирани модерни инвертер системи кои ќе овозможат економично греење и ладење во текот на целата година.

Целта на локалната власт е да создаде современ, безбеден и функционален амбиент кој ќе биде соодветно прилагоден за секојдневните потреби на граѓаните, нивните средби, општествени активности и брзо добивање на локални услуги.

Градоначалничката на општина Кисела Вода, Бети Стаменкоска Трајкоска, појасни дека овој крупен инфраструктурен проект се реализира преку Владината програма за капитални инвестиции, со користење на финансиските средства обезбедени од унгарскиот кредит.

Таа потенцираше дека ова претставува директно буџетско вложување во капацитети кои се од непосредна корист за локалното население. Според неа, ваквите конкретни проекти на терен се уште еден доказ за цврстата заложба на општинската администрација за обезбедување рамномерен развој и подобрување на животниот стандард во сите населени места под нивна надлежност.