МТМ НЕТ

Градоначалникот на Град Скопје, Орце Ѓорѓиевски, оствари работна средба со министерот за култура и туризам, Седат Сулејмани, на која беа дефинирани клучните приоритети за унапредување на културниот живот и зајакнување на соработката меѓу локалната и централната власт.

Во центарот на разговорите беа стратешките подготовки за претстојниот мандат на македонската метропола како „Скопје 2028 – Европска престолнина на културата“, проект кој треба да остави трајни вредности, нови културни простори и содржини достапни за секој граѓанин преку прецизно мапирање на капацитетите и зголемување на туристичките потенцијали.

Двајцата соговорници извршија и непосреден увид во актуелните градежни активности на Универзална сала, симболот на скопската солидарност и нераскинлив дел од градската колективна меморија.

Беше нагласено дека по завршувањето на работите, овој култен објект ќе биде предаден на управување на Град Скопје, со што повторно ќе ги отвори своите врати за уметниците, публиката и младите таленти.

Со јасна визија и координирано дејствување, институциите продолжуваат да создаваат услови со кои Скопје достоинствено ќе ја оправда европската титула и ќе им обезбеди врвни културни придобивки на идните генерации.

Фото извор: https://www.facebook.com/1OrceGj