МТМ НЕТ

Градоначалникот на Град Скопје, Орце Ѓорѓиевски, заедно со градоначалникот на Општина Чаир, Изет Меџити, изврши увид во завршните подготвителни активности пред официјалниот почеток на изградбата на новиот булевар „Македонско-косовска бригада“.

Во рамките на првата фаза, капиталниот инфраструктурен проект ќе се реализира на потегот од крстосницата со улицата „Џон Кенеди“ до булеварот „Босна и Херцеговина“.

Новата сообраќајница е проектирана како современо решениe со четири сообраќајни ленти — по две во секоја насока, средишно и заштитно зеленило, велосипедски патеки во двата правци и нови уредени тротоари.

Проектот опфаќа и изградба на нова атмосферска канализација, модерно улично осветлување, како и посебни проширувања кај автобуските стојалишта.

Ѓорѓиевски истакна дека со овие зафати се зголемува безбедноста, се подобрува сообраќајната мобилност и се креира нов урбан простор во рамките на рамномерниот развој на сите скопски општини.