МТМ НЕТ

Градоначалникот Александар Стојкоски денеска официјално ги потпиша решенијата за исплата на еднократна помош во висина од 5.000 денари, наменета за учениците кои ја завршуваат основната настава на територијата на општината.

Оваа иницијатива, која за првпат се спроведува во Ѓорче Петров, претставува важен чекор на локалната самоуправа кон олеснување на трошоците на родителите во овој преоден период од основното кон средното образование.

Со овој потег, градоначалникот Стојкоски ја потврдува заложбата на општинската администрација за вложување во младите генерации и градење на систем на вредности што го става образованието во прв план.

Целта е да им се испрати силна порака на учениците дека нивниот успех е препознаен и дека општината е партнер во нивниот развој и идни чекори кон знаењето.

Оваа мерка е дел од континуираната политика на општината за грижа за граѓаните и имплементирање на конкретни социјални и едукативни програми.

Со реализацијата на оваа исплата, Општина Ѓорче Петров покажува висока сензибилност кон потребите на семејствата и решителност во создавањето на силна и стабилна заедница која активно го поддржува напредокот на своите млади жители.