МТМ НЕТ

Во општина Ѓорче Петров денеска свечено беше отворен Центарот за дневен престој и индивидуален третман „Во мојот свет“, нов простор наменет за грижа, поддршка и надеж на децата и младите со аутизам, како и на нивните семејства.

На настанот присуствуваше и претседателот на Македонија, Гордана Сиљановска-Давкова, која истакна дека младите со попреченост заслужуваат еднаква шанса за усовршување за да станат рамноправен дел од заедницата.

Шефот на државата изрази огромна почит и благодарност за долгогодишната пожртвуваност и посветеност на стручните кадри кои неуморно работат за да им обезбедат пристоен и поквалитетен живот на овие лица.

Според неа, преку процесот на социјализација и стекнување на клучни животни вештини, овие млади луѓе ќе станат многу повидливи во јавноста и ќе можат активно да придонесуваат за општествениот развој.

Овој нов центар претставува јасен доказ дека со заеднички ангажман, хуманост и силна институционална поддршка може да се изгради систем во кој ниту еден граѓанин нема да биде запоставен или оставен на маргините.

Сиљановска-Давкова потенцираше дека инклузијата на лицата со попреченост веќе не смее да биде само пишан збор, туку мора да прерасне во секојдневна пракса, култура на однесување и долгорочна обврска на државата, заклучувајќи дека прифаќањето на нивниот свет е всушност признавање на нашиот заеднички свет.

Фото извор: https://www.facebook.com/siljanovskadavkova