МТМ НЕТ

Општина Центар информира дека девет од вкупно 11 јавни чешмички што се под нејзина надлежност се целосно функционални, додека на преостанатите две се изведуваат санациски работи.

Во тек е поставување нова јавна чешмичка на улицата „Орце Николов“, на местото на старата која подолг период не беше во употреба поради дефект и ризик од поплавување на околниот простор.

Градоначалникот Горан Герасимовски изјави дека приоритет на општината во летниот период е граѓаните да имаат пристап до вода за пиење, паралелно со редовното одржување на зелените површини и јавната хигиена.

Тој посочи дека дел од старите чешмички се заменети со нови иноксни модели, а во соработка со ЈП „Водовод и канализација“ се поставени и водомери за нивно непречено функционирање.

Во рамки на досегашните активности, Општина Центар замени седум стари јавни чешмички со нови, изработени од инокс и со современ изглед.

Од општината додаваат дека редовно се одржуваат и системите за автоматско наводнување, при што сите дефекти што се појавуваат се санираат од надлежните служби.

За одржување и поправка на оваа инфраструктура годинава се предвидени три милиони денари, а досега се реализирани исплати во износ од 998.752 денари.