МТМ НЕТ

Советот на Општина Центар ја усвои одлуката за изработка на Архитектонско-урбанистички проект за доградба на Основното општинско училиште „Јохан Хајнрих Песталоци“, со што се отвора патот за проширување на капацитетите на училиштето и целосно воведување едносменска настава во општината.

Со доградбата ќе се обезбедат дополнителни училници и подобри услови за учениците и наставниот кадар, а наставата во училиштето ќе може да се организира исклучиво во една смена.

Со реализацијата на проектот, сите основни училишта на територијата на Општина Центар ќе преминат на едносменски модел на работа.

Градоначалникот Горан Герасимовски оцени дека станува збор за значаен чекор во унапредувањето на образованието, истакнувајќи дека со зголемувањето на капацитетите се исполнува едно од клучните ветувања на локалната власт и се создаваат поквалитетни услови за учење и подобра организација на наставниот процес.

Од Општина Центар наведуваат дека продолжуваат со инвестиции во образовната инфраструктура, со цел учениците да добијат современи, безбедни и функционални училишни услови.