МТМ НЕТ

Општина Центар ја започна реализацијата на првата фаза од проектот за уредување на улицата „Даме Груев“, со кој ќе се обноват јавните површини на потегот од Зеленото пазарче до улицата „Македонија“, како и делот од „Македонија“ до Собранието.

Проектот предвидува партерно и хортикултурно уредување, со цел просторот да стане поуреден, пофункционален и попривлечен за граѓаните.

Во оваа фаза се поставуваат нови клупи и корпи за отпадоци, а предвидена е и изградба на детско игралиште и современа фитнес-зона на отворено.

Со овие содржини, жителите и посетителите ќе добијат дополнителни можности за рекреација, одмор и дружење.

Градоначалникот Горан Герасимовски посочи дека уредувањето на јавните простори е меѓу клучните приоритети на Општина Центар.

Според него, со новите зелени површини и урбаната опрема се создаваат поквалитетни услови за престој на отворено, а општината ќе продолжи да вложува во проекти што придонесуваат за подобар квалитет на живот на граѓаните.

Со реализацијата на оваа фаза, Општина Центар продолжува со модернизација на јавната инфраструктура и создавање безбедни, функционални и уредени јавни простори што одговараат на потребите на локалното население.