МТМ НЕТ

Во Радишани официјално започна реализацијата на еден од најзначајните спортски проекти во општина Бутел, откако беше поставен камен-темелникот за изградба на нов затворен пливачки базен во рамките на ООУ „Ацо Шопов“.

На свеченоста присуствуваа премиерот Христијан Мицкоски, министерката за образование и наука Весна Јаневска и градоначалникот Дарко Костовски, кои ја потенцираа важноста на овој инвестициски зафат за промовирање на здрави навики кај помладите генерации.

Со оваа капитална инвестиција вредна 77 милиони денари, општината добива модерен спортски комплекс кој треба да биде комплетно финализиран во рок од 18 месеци.

Објектот, кој се простира на површина од 621 квадратни метри, е проектиран според строгите стандарди на Светската пливачка федерација (ФИНА), што овозможува одржување на професионални тренинзи и натпревари.

Покрај базенот со четири патеки, комплексот ќе располага и со сите придружни содржини, вклучувајќи соблекувални и тушеви, со што станува функционално катче за учениците, локалните спортски таленти и сите останати граѓани.

Градоначалникот Костовски истакна дека изградбата на овој базен е исполнување на ветувањето за силен фокус кон развојот на спортската инфраструктура и подобрувањето на условите за децата.

Тој изрази благодарност до централната власт за поддршката, нагласувајќи дека општината ќе продолжи со истото темпо да инвестира во проекти кои директно влијаат врз квалитетот на живеење и создавањето здрава иднина за своите жители.

Фото извор: https://www.facebook.com/darkokostovskizabutel