МТМ НЕТ

Во првиот квартал од 2026 година продолжува трендот на зголемена употреба на електронските платежни услуги, при што граѓаните реализирале повеќе плаќања и со поголема вкупна вредност во споредба со истиот период лани.

Според најновите податоци, плаќањата со платни налози бележат раст од 10,3 проценти кај бројот на извршените трансакции и 14,6 проценти кај нивната вредност во однос на првиот квартал од 2025 година.

Најизразен раст е забележан кај електронските плаќања. Бројот на електронски иницираните платежни трансакции е зголемен за 21,9 проценти, додека нивната вредност пораснала за 23 проценти на годишно ниво.

Најголемиот дел од електронските плаќања – 72,8 проценти – се реализирани преку мобилни апликации, што претставува годишен раст од 25,9 проценти. Податоците покажуваат дека мобилниот телефон сè повеќе станува доминантен канал за извршување плаќања, благодарение на неговата достапност и едноставната употреба.

Позитивен тренд е забележан и кај плаќањата со платежни картички. Бројот на трансакциите е зголемен за 12,2 проценти, а нивната вредност за 14,5 проценти. Растот најмногу се должи на интернет-плаќањата, кои се зголемени за 18,7 проценти, како и на плаќањата на физичките продажни места, каде што е регистриран раст од 11,7 проценти.

Во зголемувањето на дигиталните плаќања придонесува и воведувањето нови платежни решенија од страна на банките, кои овозможуваат плаќање преку мобилни уреди без употреба на физичка платежна картичка.

Според податоците, дигитализираните картички учествуваат со 17,9 проценти во вкупниот број издадени платежни картички во земјава. Во просек, преку секоја дигитализирана картичка се реализираат четири плаќања со мобилен телефон, што укажува на континуирана промена на навиките на граѓаните и сè поголемо прифаќање на дигиталните финансиски услуги.

Податоците потврдуваат дека процесот на дигитализација на платежните услуги продолжува со забрзано темпо, при што електронските плаќања и платежните картички имаат сè поважна улога во секојдневните финансиски активности на граѓаните.