МТМ НЕТ

Спортот, хуманоста и позитивната енергија се соединија на платото пред спортскиот центар „Јане Сандански“, каде официјално започна едно од најубавите спортско-хуманитарни случувања во земјава — „No Finish Line Skopje“.

Оваа уникатна манифестација носи 100 непрекинати часа трчање, одење и дружење, трансформирајќи ја општина Аеродром во вистински центар на солидарноста.

За разлика од класичните спортски надпревари, ова не е трка за медали, туку мисија во која секој изминат километар претставува директен чекор кон обезбедување помош и подобра грижа за пациентите во Детската болница „Козле“.

Масовниот одзив на децата, родителите, спортските ентузијасти и бројните хумани граѓани уште еднаш потврди дека Аеродром живее со спортот и поседува извонредно развиен колективен дух.

Градоначалникот Дејан Митески истакна дека ваквите настани се најдобар доказ за моќта на спортот да обединува, да раздвижува и да твори дела со вистинска вредност за оние на кои им е најпотребно.

Со секој претрчан круг на патеката испратена е порака на надеж, покажувајќи дека хуманоста нема лимити и дека секој индивидуален напор може да се претвори во огромна поддршка за најмладите.