МТМ НЕТ

Во Општина Аеродром се одржа значајна работна средба меѓу општинското раководство и тимот задолжен за меѓународниот проект „ЕУ поддршка за воспоставување на регионален систем за управување со отпад во Скопскиот регион“, предводен од раководителката Марина Илиќ.

Градоначалникот Дејан Митески информираше дека во фокусот на разговорите било воспоставувањето на современ и одржлив модел кој подразбира координирана соработка меѓу повеќе општини во процесите на собирање, транспорт, третман и долгорочно управување со комуналниот отпад.

Овој регионален пристап, поддржан од европските фондови, има за цел да овозможи поефикасно користење на расположливите ресурси, подигнување на нивото на заштита на животната средина и трајно елиминирање на дивите депонии преку рециклирање и повторна употреба на суровините.

Митески ја искористи можноста да ги презентира досегашните резултати, нагласувајќи дека Аеродром континуирано работи на унапредување на еколошките стандарди и подигнување на јавната свест преку неколку пионерски проекти.

Општината, преку своето Јавно претпријатие за комунални дејности, редовно спроведува масовни активности на терен, а воедно е меѓу првите во државата што воведе функционален систем за селектирање на пластична ПЕТ-амбалажа директно од самите домаќинства.

Дополнително, во соработка со овластени колективни постапувачи, на оваа територија организирано се собира текстилен отпад, отпадни гуми, како и опасниот електричен и електронски отпад. За заштита на околината, во тек е и еколошкиот проект „Clean AirDrom“ насочен кон најмладите, а градоначалникот заклучи дека Општината останува отворена за сите современи решенија кои ќе придонесат за почист и поодржлив Аеродром.

Фото извор: https://www.facebook.com/miteskid