МТМ НЕТ

Училишниот двор на основното училиште „Гоце Делчев“ во општина Аеродром наскоро ќе добие ново детско забавно игралиште, наменето за рекреација и безгрижна игра на најмладите.

Како што информираше градоначалникот Дејан Митески, овој проект има посебна вредност бидејќи во неговата изградба директно учествуваат млади волонтери и ученици од САД, кои заедно со своите врсници од училиштето, преку заедничка работа и дружење испраќаат силна порака за солидарност и пријателство.

Инвестицијата се реализира со донација од американската компанија „LinkAcross“ од Вирџинија, предводена од Клеј Рендл Бутемер, а целиот процес е поддржан и од Советот на родители при ООУ „Гоце Делчев“.

Локалните власти упатија искрена благодарност до сите инволвирани страни кои покажаа висок степен на општествена одговорност и грижа за поквалитетно секојдневие на децата од овој дел на општината.

Паралелно со изградбата на игралиштето, училиштето успешно обезбеди и грант во вредност од 60.000 денари преку проектот на Министерството за образование и наука посветен на заштита од насилство и злоупотреба на ученици со и без попреченост.

Со овие средства, како единствено наградено училиште од Аеродром, тие веќе набавуваат четири сета маси со клупи за дворовите на централното и подрачното училиште, а истовремено го збогатија и библиотечниот фонд со 60 нови лектирни изданија, потврдувајќи ги заложбите за континуирано инвестирање во иднината на најмладите.

Фото извор: https://www.facebook.com/miteskid