Просечната месечна исплатена бруто-плата по вработен во јуни 2026 година изнесува 72.785 денари, соопшти Државниот завод за статистика.

Во споредба со јуни 2025 година, просечната бруто-плата е зголемена за 6,5 отсто.

Растот, според податоците, во најголем дел се должи на зголемувањето на просечната исплатена бруто-плата во неколку сектори.

Најголем раст од 10,7 отсто е регистриран во секторот „Административни и помошни услужни дејности“.

Во секторите „Земјоделство, шумарство и рибарство“ и „Транспорт и складирање“ просечната бруто-плата е зголемена за 8,1 отсто, додека во „Преработувачката индустрија“ растот изнесува 7,7 отсто.

Од друга страна, во однос на претходниот месец, намалување на просечната месечна исплатена бруто-плата е забележано во повеќе сектори.

Најголемо намалување од 8,6 отсто има во секторот „Трговија на големо и трговија на мало; поправка на моторни возила и мотоцикли“.

Следуваат секторите „Уметност, забава и рекреација“, со пад од 6,2 отсто, и „Снабдување со електрична енергија, гас, пареа и климатизација“, каде што просечната бруто-плата е намалена за 6,1 отсто.