Инфлацијата мерена преку индексот на трошоците на животот во јули 2026 година, во споредба со јуни, изнесува 0,1 отсто, покажуваат најновите податоци.

Најголем месечен раст на трошоците е забележан во групата Транспорт, каде цените се зголемени за 4,4 отсто, додека поскапувања има и кај рекреацијата, спортот и културата за 2,6 проценти, домувањето, водата, електричната енергија, гасот и другите горива за 0,9 проценти, како и кај рестораните и услугите за сместување за 0,7 проценти. Благ пораст е регистриран и кај услугите за образование за 0,3 проценти и алкохолните пијалаци и тутунот за 0,1 процент.

Од друга страна, најголемо намалување на трошоците е евидентирано кај покуќнината и опремата за домаќинствата, каде цените се пониски за 1,4 отсто, како и кај храната и безалкохолните пијалаци, кои поевтиниле за 1,1 отсто. Намалување има и кај облеката и обувките за 0,2 проценти, како и кај информациите и комуникациите и здравствената заштита, каде цените се пониски за 0,1 процент.

Во групите осигурување и финансиски услуги и лична нега, социјална заштита и разновидни стоки и услуги не се забележани промени во однос на претходниот месец.

На годишно ниво, односно во споредба со јули 2025 година, индексот на трошоците на животот е зголемен за 2,3 отсто, додека индексот на цените на мало бележи раст од 1,8 отсто.