МТМ НЕТ

Претседателката на државата, Гордана Сиљановска Давкова, и претседателот на Сојузот на стопански комори, Горан Ѓорѓиевски, денеска свечено ги доделија престижните признанија „Македонски квалитет“ за 2025 година. Оваа награда им се врачува на најуспешните домашни компании кои преку својот континуиран раст, иновативен пристап и високи стандарди во работењето даваат значаен придонес за националната економија и нејзината меѓународна промоција.

Овогодинешните добитници на ова високо признание се компаниите: Комерцијална банка АД, Малиќи Груп, Голден Арт, ЛТХ Леарница ДООЕЛ Охрид, Пекабеско АД, Боми 10 Логистик, Нетам ДОО, Еко Логистик Сервис, Кабтел ДООЕЛ, Велидент Трејд и Дамипак ДООЕЛ. Селекцијата е направена врз основа на прецизно утврдени критериуми, вклучувајќи ја квалитетот и сигурноста на производите, финансиската стабилност, деловната етика, вложувањето во човечки ресурси и придонесот кон локалната заедница.

Во своето обраќање, претседателката Сиљановска Давкова истакна дека овие награди се логична последица на стратешко размислување и системско вложување во креативен човечки капитал и современи технологии. Претседателот на ССК, Горан Ѓорѓиевски, нагласи дека во ера на силна глобална конкуренција, квалитетот веќе не е само избор, туку суштинска неопходност за долгорочен успех и градење доверба кај потрошувачите. Наградените компании се вистински амбасадори на домашниот квалитет и клучни двигатели на економскиот развој, кои со својата визија и истрајност служат како инспирација за целокупното македонско стопанство.