МТМ НЕТ

Градоначалникот на Општина Кисела Вода, Орце Ѓорѓиевски, едногласно доби нов мандат да претседава со Заедницата на единиците на локалната самоуправа (ЗЕЛС). На денешното Генерално собрание, за нови потпретседатели беа избрани градоначалниците Изет Меџити и Горан Герасимовски. Реизборот се смета за потврда на досегашните напори за зајакнување на општините и воспоставување функционален дијалог со централната власт.

Ѓорѓиевски истакна дека новиот мандат се темели на созреани капацитети по две децении децентрализација и на искуството на градоначалниците кои веќе имаат зад себе успешни мандати. Тој нагласи дека ЗЕЛС сега има партнерски однос со Владата, што веќе резултира со видлив инфраструктурен развој во општините. Како еден од најзначајните успеси во изминатиот период беше наведено прифаќањето на барањето за воспоставување општинска комунална полиција, реформа која треба значително да го подобри редот во локалните средини.

Во периодот до 2030 година, ЗЕЛС ќе се води според нова Стратегија која предвидува:

Поголема децентрализација во областа на социјалната заштита;

Обезбедување финансиска стабилност преку зголемен удел во јавните приходи;

Подобра наплата на сопствените извори на приходи;

Дигитализација и понатамошен развој на електронските услуги за граѓаните.

Претседателот Ѓорѓиевски заклучи дека ЗЕЛС останува инклузивна заедница каде сите општини настапуваат рамноправно, без разлика на нивната политичка или етничка припадност, со јасна визија за лобирање во интерес на сите граѓани.