МТМ НЕТ

Во чест на големиот јубилеј – 80 години од основањето, Македонскиот народен театар (МНТ) денеска свечено ја промовираше монографијата „Македонски народен театар 1945 – 2025 – Приказни поголеми од времето“. Ова капитално издание, поддржано од Министерството за култура и туризам, претставува полифонски портрет на најзначајната театарска институција во земјава, обединувајќи историски документи, лични сведоштва и емотивни сеќавања на генерации уметници.

Главната уредничка д-р Ивана Јарчевска и визуелниот уметник Зоран Кардула создадоа дело кое не е само статистички збир на податоци, туку интимно патување низ театарската мисла. Монографијата содржи текстови од 27 истакнати автори – актери, режисери, професори и теоретичари, меѓу кои Никола Ристановски, Дејан Дуковски, Ѓорѓи Јолевски, Игор Џамбазов и многу други, кои со својот специфичен глас го раскажуваат континуитетот на МНТ како простор на прогрес и слободна мисла.

На промоцијата, министерот за култура Зоран Љутков и директорот на МНТ, Никола Кимовски, порачаа дека театарот е дом на уметничката храброст кој ни помага подобро да го разбереме светот. Актерот Ѓорѓи Јолевски го опиша МНТ како „лабораторија на духот“, додека Дејан Дуковски преку видео порака ја истакна нераскинливата врска меѓу личните судбини на уметниците и театарските штици.

Одбележувањето на јубилејот продолжува на 29 декември, кога на големата сцена премиерно ќе биде изведен театарскиот спектакл „Сонцето, колку е блиску сонцето – Made in MNT“, во режија на Дејан Пројковски, како врв на празничната програма.