МТМ НЕТ

Академијата за странски јазици „English Language Academy“ (ELA) со гордост ја најавува својата традиционална хуманитарна акција, која годинава се одржува по трет пат. Под мотото „ELA во Погон“, учениците од оваа академија подготвуваат голем Божиќен базар на кој преку креативност и солидарност ќе се собираат средства за оние на кои им е најпотребно.

Настанот ќе се одржи во недела, 21 декември, со почеток во 12:00 часот. Посетителите ќе имаат можност да купат уникатни рачни изработки подготвени токму од вредните раце на учениците. Целта на оваа иницијатива е благородна – сите собрани средства од продажбата ќе бидат донирани за дечињата кои се лекуваат на Клиниката за детска хирургија.

Организаторите истакнуваат дека овој базар не е само место за купување празнични украси, туку лекција по хуманост и емпатија за младите генерации. Со секоја купена изработка, граѓаните директно придонесуваат за подобрување на условите и поддршка на малите пациенти, внесувајќи празнична радост во болничките ходници.

Од академијата упатуваат отворен повик до целата јавност да се придружи на овој убав настан, да ја поддржи детската креативност и заеднички да ја покажеме моќта на заедницата кога се обединува за хумана цел.