МТМ НЕТ

Здружението на новинари на Македонија (ЗНМ) и Самостојниот синдикат на новинари и медиумски работници (ССНМ) изразија сериозна загриженост во однос на одредени формулации во предлог-Резолуцијата за миграција, која партиите од владината коалиција ја поднесоа до Собранието. Новинарските организации предупредуваат дека недоволно прецизните делови од документот кои се однесуваат на јавниот говор и медиумското известување можат да ја ограничат слободата на изразување и правото на информирање.

Главната забелешка се однесува на директното поврзување на термините „дезинформации“ и „ширење паника“ со примена на Кривичниот законик, без притоа јасно да се дефинира границата меѓу политичката пропаганда и професионалното новинарско известување. Според ЗНМ и ССНМ, ваквите општи формулации отвораат широк простор за субјективни толкувања и потенцијални злоупотреби, што може да предизвика обесхрабрувачки ефект кај новинарите при обработка на теми од јавен интерес.

Организациите потсетуваат дека во едно демократско општество, медиумите имаат обврска критички да ги преиспитуваат политиките на власта, дури и кога информациите се контроверзни. Тие нагласуваат дека професионалното известување засновано на етички стандарди не смее да се поистоветува со закана по јавниот ред и мир или со „лажни сценарија“.

Наместо решенија преку политички акти, ЗНМ и ССНМ апелираат за користење на веќе воспоставените механизми за саморегулација, како што се Советот за етика во медиумите и Советот на честа. Тие упатија јасен повик до институциите при донесувањето на вакви документи да бидат исклучително внимателни за да не се создаде впечаток на притисок или цензура врз медиумите, кои се клучниот столб на демократијата.